ཟླ་ངོགས་ཀྱི་འཇིག་རྟེན།

Posted: ཟླ་བདུན་པ། 29, 2010 in སྙན་རྩོམ་མུ་ཏིག་ཕྲེང་བ།

 

 

བརྩེ་བ་འོད་ཀྱིས་འཕྲོ་བའི་ཟླ་ངོགས་ཀྱི་ལྡུམ་རྭ།།

སེམས་པ་ཕྱག་གིས་འགྱོགས་པའི་ན་གཞོན་གྱི་བརྩེ་འདང༌།།

བྱད་བཞིན་འཛུམ་དུ་འཁྱིལ་བའི་ཕྱུགས་ཆུང་གི་འཇོ་སྒེག།

འདོད་ལྡན་མིག་དབང་འཕྲོག་པའི་གཞི་མ་རུ་བསྟབས་འདུག།

 

མུ་ཏིག་ཚོམ་བུར་འཐོར་བའི་ཨ་སྔོན་གྱི་དབྱིངས་རིམ།།

བརྩེ་བ་སྤྱན་ནས་འཛུམ་པའི་དགའ་མ་ཡི་ལང་ཚོ།།

ཆེ་ཆེར་བཞད་ཅིང་འཚེར་བའི་སྐར་ཆེན་གྱི་མིག་ཞགས།།

དུང་བ་སྙིང་ལ་འཇོ་བའི་སེམས་སོང་གི་རེ་སྨོན།།

 

ཆུ་དྭངས་རྫིང་བུར་ཟགས་པའི་འོད་དཀར་གྱི་ཟླ་གཞོན།།

ལྗང་སྣུམ་པད་འདབ་མཉེན་མོའི་སེང་རས་ཀྱི་ཕག་ནས།།

ཤབ་ཤུབ་སྙིང་གཏམ་མཆེད་པས་མཚན་གུང་གི་ལྷིང་འཇགས།།

དཀྲོགས་ལ་མཚར་སྣང་སྟོང་གི་རྣ་བ་དེ་བླགས་འདུག།

 

སྐར་ཚོགས་བྱེ་བས་བཏུམས་པའི་ཉ་གང་གི་ཟླ་བ།།

མཛའ་མོ་གློ་བ་དགའ་བའི་བཞིན་སྣོད་དུ་འདོད་ནས།།

སྲིད་རིང་གནམ་སྐས་སྐྱོར་བའི་དགུ་ཚིགས་ཀྱི་རྨུ་ཐག།

ཟླ་བ་ཕྱག་གིས་ལེན་པའི་རྨི་ལམ་དུ་བཟུང་འདུག།

 

ཟླ་འོད་ཆེམ་ཆེམ་འབབ་པའི་སྟོན་གཞུང་གི་མཚན་ལྗོངས།།

རོགས་ལོ་སེམས་རྩ་དྲོ་བའི་གཞི་མ་རུ་ཤེས་ནས།།

དྭངས་གཙང་བྱིས་བློའི་སྦུབས་ཀྱི་ཉམས་ཆུང་གི་སེམས་པ།།

ཉིན་བྱེད་དབང་པོ་འགོག་པའི་རྔུལ་ཆུ་རུ་འཐིམས་སོང༌།།

 

མཁའ་ན་ཆེམ་གྱིས་བསྣར་བའི་རྒྱུ་སྐར་གྱི་མུ་ཏིག།

མཛེས་ལྡན་སྙིང་ལ་འབབ་པའི་མགུལ་རྒྱན་དུ་བསམས་ཏེ།།

རྒྱ་ཁབ་རྩེ་ལས་རྣོ་བའི་དུང་སེམས་ཀྱི་ཚོར་བས།།

ཕྲ་རིང་ཕྱི་ཐག་དུང་གི་སྲད་བུ་ལ་བརྒྱུས་སོང༌།།

 

ཡངས་པའི་ནེའུ་གསིང་སྤྲས་པའི་དུང་མདོག་གི་ཟླ་ཞུན།།

སྒེག་མོའི་བརླ་ཤ་གསལ་བའི་རང་བྱུང་གི་སྣོན་པ།།

ཁྲ་ཆིལ་བགྲང་ལ་ངལ་བའི་རྒྱང་རིང་གི་སྤྱན་འོད།།

དགའ་སྣང་འབུམ་གྱིས་མྱོས་པའི་སྒྱུ་རྩལ་ལ་འཕྲོས་འདུག།

 

༢༠༠༩།༨།༩།

Advertisements

དཔྱད་མཆན་སྤེལ།

Please log in using one of these methods to post your comment:

WordPress.com Logo

You are commenting using your WordPress.com account. Log Out /  བཟོ་བཅོས། )

Google+ photo

You are commenting using your Google+ account. Log Out /  བཟོ་བཅོས། )

Twitter picture

You are commenting using your Twitter account. Log Out /  བཟོ་བཅོས། )

Facebook photo

You are commenting using your Facebook account. Log Out /  བཟོ་བཅོས། )

Connecting to %s